ماقلت لك - سعد أل سعود ( المنادي )

ماقلت لك لاتذكري طاري البعد
خليني أشعر بالفرح في حضورك

لاصرت اببكي في الوصل ليلة الصد
وش عاد يبقى من ليالي سرورك

ماللجفا وسنينه المظلمة حد
لاغاب عني ياأقرب الناس نورك

تخيلي أني بعد كل هالود
لاقادر احكي لك ولااقدر ازورك

دمعة غيابك تجرح القلب والخد
ومااظن دمعاتي بترضي غرورك

ماقلت احبك وانتي الحب ممتد
في داخلي روح ٍ تفوح بزهورك

قلبي نثر لك في طريق الوفا ورد
ولاتعدت خطوته باب سورك

وعايشتك احلامك من الشوق للوجد
في خافقي ماغيرك يعيش دورك

لاتوعديني مابي الزمك بالوعد
ابيك لكن لابغاني شعورك

© 2024 - موقع الشعر