يا هاجسي دندن و جر المواويل .. طنب بصوتك باللحون الطويلات - فهد بن ناوي الرشيدي

يا هاجسي دندن و جر المواويل
طنب بصوتك باللحون الطويلات

وضح بصوتك خافيات التفاصيل
و اقصد ما دام العمر روحه و جيات

اما قصيدن يطلق الوجه لا قيل
و يجنبك هرج العذل و الملامات

و الا اترك اسجه و بدع التماثيل
و انسى الشعر و امسح جميع الملفات

و يا هاجسن حضرت جزل الاقاويل
و احكمت قيفانك و رتبت الابيات

هج الهجوس النادرات المجاميل
و اذكر طحاطيح الشرف و المروات

شروا الذي للضيف ساق الفناجيل
و اليا ارتكى شال الحمول الثقيلات

شيخن صميدع لا وطتك الغرابيل
و الحظ خانك و الموارد قليلات

حاجتك لو كانت ورا شاطي النيل
يجتابها لو ناطحته المستحيلات

فكاك عقدات الليال المحابيل
ريف الخوي عند الظروف الشديدات

ابو وليد علاج روس المهابيل
من روس قومن يحتمون الحليلات

مشاعله يوم السيوف المصاقيل
و يوم المشوك و المهار الاصيلات

من ناشهم شاف التعب و البهاذيل
و اقفت مجاهيمه و ذاق المهانات

حليلهم يذبح ثمانين حلحيل
و اليا بغو هدو جبال السراوات

اهل الجمايل متعبين المعاميل
زبانت الصاحب لا شاف التعاسات

من روس عبس مطوعين الغرابيل
اهل المراجل و الفعول القديمات

ما قلتها شحذه و ادور محاصيل
يقطعك يا هرجن كساك الجمالات

و انا ولد شيخ عرفوه الرجاجيل
من روس قومن يعشقون البطولات

مهامزة لا شان مد المقابيل
فكاكت اغلاق الليال العنيدات

ستر العذارى لابسات الخلاخيل
بيض الجباه مقلطين السمينات

تاريخهم عند الرجال الحلاحيل
معروف و موثق بوسط السجلات

و الحق ما يمحقه هرج الاباطيل
و الناقصة ما هي سوات الجزيلات

و تم القصيد اللي بديته على ايل
و انهيت قيفانه على قافية ات

© 2022 - موقع الشعر