معلم شعر مثل ابن ريفه وبن نغموش

لـ حسن عامر، ، في المدح والافتخار، آخر تحديث

معلم شعر مثل ابن ريفه وبن نغموش - حسن عامر

سلامي على اللي منهجه بالوفا منقوش
حياته على ماطاب لله ناقشها
 
رجال تحوش الطايله والمراجل حوش
على سلم أهلها اللي يشرف تعايشها
 
رجال تهدر الدم الأحمر من أجل البوش
فعول شباب اليوم ماهوب نايشها
 
ياكافي البلا لباست الجنز والطربوش
وأهل قصة في موسط الرأس نافشها
 
شباب غدو في عالم العلولمه والطوش
على منهج التفكير فكري مهمشها
 
ولا اعمهم فيهم شباب تهاوش هوش
من أجل الشيم والدين دايم تناقشها
.
رتيبان بن مقعد السبيعي
.
.
هلامرحبا ترحيب منه الرجال تشوش
تراحيب روس اهل الحميا يشوشها
 
تراحيب طيب وجود ماطبها المغشوش
من اجزل بيوتٍ للشعرطاب مفرشها
 
وبالورد والريحان ديباجها مرشوش
ومن أغلا العطور العالميه مرشرشها
 
وفيها من الكادي القريب العهد محشوش
وعقدين فلّ وكفّ حاذق مزركشها
 
وسمن وعسل صافي وبن اليمن وكبوش
من أجل السبيعي كل ابوها محوشها
 
تقف باحترامٍ كنها بالنظام جيوش
لشاعر سبيع الشهم قبله نجيشها
 
معلم شعر مثل ابن ريفه وبن نغموش
بيوت الجزاله بالقوافي ينعنشها
.
حسن عامر آل عيسى
© 2024 - موقع الشعر