البيرق المنكسر - سداح العتيبي

مافيه داعي تهلّ الدمع من شاني
بكره يقولون ليه الحبّ بكيّته

أنا تمنيّت تذكرني وتنساني
وأنته يا ليتك تمنىّ اللي تمنيّته

رسايلك جات .. بين أسمي وعنواني
وتعلّقت بين .. ضيّعته ودليّته

بعض البشر لو يدوّرني ما يلقاني
وبعض البشر لو يجاذب سيرتي جيته

لا تنشغل خلّني يا سيد خلاني
استسمحك وقتي اللي معك مضيّته

قل فارس الحلم .. خليّته وخلاني
أو قول بالعكس .. خلاني وخليّته

ياسيفي ودرعي وخيلي وميداني
البيرق المنكسر لرضاك رزيّته

أموت من ضيقتي مير الله أحياني
وجوارحي نوب لا حيّه ولا ميته

رغم اني اعاني من الوقت ما اعاني
مسحت صبري على جرحي وداويته

يا اللي تبيها سوى وصلي وهجراني
الأوّله زلّها .. والثانيه ليته

فرشت لك قلبي وشلتك في وجداني
وأرتحت في قلبي المفروش وأذيّته

في ذمتك لا تراودني على أجناني
وصلت حدّ الجنان ولا تعديّته

وان قلت وشجاك مدري منك وشجاني
مغير مديّت لك كفيّ وعضيّته

ماعاد مع راسي الا روس جنحاني
والريح لاهبّ مع طاريك هبيّته

اسمح لي اجرّ صوتي واسحب الحاني
والشعر .. لا ضقت غنّاني وغنيّته

العام انا .. مبتلش في عقدة الساني
واليوم انا .. شاعرن ما ينهدم بيته

© 2024 - موقع الشعر