يا عين حرٍّ فوقنا يرخي النظر
يوم الكحيله طيّحت خيّالها
ما ينزل البيرق لو الشيخ انكسر
لين يتقاضاها بعشر امثالها
وان قالها الله ما تردّين الوكر
إلاّ وذي الكحلا وهو في جالها
بالجوخه الحمرا يبشّر بالظفر
و يبشّر الذيبه بزاد عيالها
للحرب حقٍّ مطلبه كرٍّ و فر
ومن لا يوفّي حقها ما احتالها
واللي ارتكا لحمولها قام وصبر
وان ميّلت شدّ الحزوم و شالها
صبرٍ على الدنيا ولا منها مفر
عذرا تساوى ادبارها باقبالها
اليا اقبلت صوبك تحيزم بالحذر
واليا ادبرت عنّك فلا تسعى لها
لابد من ساعه يجي فيها خبر
تنبيه شيبان العرب جهّالها
يسقي على عينٍ تناوشها السهر
حتى تناظر حاجةٍ في بالها
وسيوفنا اللي حدّها قص الظهر
ماهي تموت الاّ بموت رجالها
اللي يبون خضابها الدم الحمر
تتبعهم العيزا وتلقا فالها
وراعي الكحيله لا تعزوا بالفخر
نلحق براكين اللقا زلزالها
حنّا على خصمه لهيبٍ من سقَر
وحنّا معه جنّه وهو نزّالها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر