جورج قرداحي

تكفا طلبتك طلب يا جورج قرداحي
مع كلّ حلقه تسجلّها تناديني

أزهمني اطير لك واسابق جناحي
والله له المنّه .. ولحدن يوديني

(الأرض يمشي بها المجنون والصاحي)
قافن .. ودايم تغنيّ به جناحيني

أبنفض الريش والبس للهوا وشاحي
والشمس لا غمضّت ما غمضّت عيني

في ظرف خمسة دقايق تسمع فياحي
وصلت سالم عسا ربي يعافيني

قل مرحبا ياهلا بالشيخ سداحي
واقول دام البقا والله يحييني

مستنكر اصراري ومستغرب الحاحي
ابكسر الحاجز اللي بينك وبيني

هوايتي قفلّت .. بابي بمفتاحي
وطموحي ارد دمي في شراييني

مغير اجر اللحن واومي بمسباحي
دخّلني أمسابقتك ولا تخليني

أسأل وأنا أجاوبك واثق ومرتاحي
وفي ذمّتك لا تغش ولا تخاشيني

ما ابغا اختيارات ولا جمهور صداحي
يكفيني اصدح لحالي وانت توحيني

ولا تتصل في مناحي سافر مناحي
ولا فيه غيره يعرف الجيم والسيني

دايم جوابي نهائي لاح ياملاحي
مقرود خلقه والاحي من يلاحيني

بالك تفلسف عليّ وتنبش اجراحي
قل صح ولا خطا والحظ يرضيني

ياثقل دمك ليا عودّت مزاحي
لبناني المرجع ودمّك فلسطيني

مليونك اب شنطتك وكفوفك شحاحي
وانا ديوني تعدّن الملاييني

وان كان مال النصيب وحظّها طاحي
ماقلت لك عطني ولا ابغاك تعطيني

اسمع صحيح النبا ياجورج قرداحي
ان كان ما اغناني الله منت مغنيني