يبكون للفرقى وللوصل يبكون - ماجد بن رتيق

يا سامعيني طيّب الله نباكم
هو فيه احد عاشق ولا هو بمجنون
 
 
هو فيه عاشق منكم أومن سواكم
ما تلتله شوقه على أجمل عيون
 
 
في كل حالات الهوى محتواكم
شوق وهيام ودمع واشجان وحزون
 
 
دايم سما العاشق خلاف لسماكم
ليله نهار و كلكم فيه تمسون
 
 
دايم خفوقه بالهيام امتراكم
ميت وله للي بالأعماق مصيون
 
 
حالاته احوال ونهاره مساكم
ذا يشتكي لكن هذاك مفتون
 
 
كلاّ له اطواره ولا له محاكم
يبكون للفرقى و للوصل يبكون
 
 
لا فيه لا قاضي ولا فيه حاكم
يبطش هيام و يهلك القلب بالهون
 
 
لو من تبونه للأسف ما يباكم
أو من يباكم ما تبون و تعافون
 
 
لو من تحبونه حياته معاكم
أو من تعَشقونه من اللي يغيبون
 
 
العشق بلوى و ان لفاكم و جاكم
يدهل قلوب الكل عنوات و يمون
 
 
العشق موت ولا بدى وانتهاكم
أحياء لكن بالغوالي تموتون
 
 
يا سامعيني طيّب الله نباكم
عشقي جنون وراعي العشق مجنون
 
بن رتيق
© 2024 - موقع الشعر