يا محرق الصوره اللي جيت بالصوره
يا جعل الايام تحرقلي مصورها
زل الشهر وابتدء الثاني على دوره
وأنا عيوني وراء دعواك مسهرها
النوم كيف أقبله والكبد ممروره
ما دام مازال عنها المر عاذرها
كان بقيت على ذا الحال مخطوره
ماني مرتاح لين الله ييسرها
اقفى وأنا أقفيت كلاً فيه حاشوره
كلاً اعيونه مسبلتاً عبايرها
وضاقت علي الفضا تقول محصوره
امشي ما الارض وذرعها ومترها
ليا شفت لي مجتمع جنبت جمهوره
خايف يشوفون في نفسي تغيرها
أصد عنهم مادام الحال مستوره
لو سألوا كلمتي وشلون اعبرها
مجروح والجرح ما حصلت دكتوره
ليا جيت ديره تعذرني دكاترها
ولع بقلبي مثل نيران تنوره
كن القنابل وراء ضلوعي تفجرها
ليا جيت أهديه عيت تسكن شعوره
هذي علومه من أولها ليا خرها
يا ليت الاسباب تحت الارض مقبوره
تموت في منيها ويموت قابرها
واقول يا نفس مسموحه وماجوره
حالتك حاله بحاجه مين يقدرها
وتقديرها رايةً بالعز منشوره
بيضاءً شوقه العيون اللي تناظرها
من حد الاردن اليا نجران وشروره
كلاً درى عن معزتها وخابرها
ديرة هل الشرق وهل الغرب ممطوره
وديرة عتيبه سنة ما شيف ماطرها
نطلب كرم جاعل السيئات مغفوره
يعوض اهليها بعد جرحت مشاعرها
ربي ولا دعوتي دونه مقصوره
لرضاه نفسي مطوعها وجابرها
ماملت مع عاطفه وضحى ولا نوره
خوفاً منه رادعاً نفسي وقادرها
كم بالي من خفايا كل غندوره
والله ما انظر بعيني في محاجرها
مابي عيوني تشاهد للعرب عوره
الناس ما حب اطالع في معاورها
ما حرم الله رجلي عنه مقصوره
وإن مشت يمه عسى ربي يكسرها
يا جعل من لامني رجلاه مكسوره
نهار غبه يدور من يجبرها
متى يبين القمر واسري على نوره
والعين ترسلها الفرحه بشايرها
وحطلي حفلتاً في نجد مشهوره
تدريبها الناس غايبها وحاضرها
وأنا اعرف الناس منهيه وماموره
بحكمة الله عبيد الله يدبرها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين