هجاد السنين

لـ عوض الحربي، ، في غير مصنف، 74

هجاد السنين - عوض الحربي

انا وين ابى اوجه والامال مكلومه
عجزت اتجاوز جرحها كيف اداويها

هجاد السنين ونار بالجوف مشعومه
ودونتها تالف من اول لياليها

امالٍ مخالطها شقا كوم مردومه
على ضلع صدرٍ له زمانٍ يداريها

تهجده هجاد بلدغةٍ جات مسمومه
على سقمها صابر وبانت مواريها

مع الناس عايش والتفاكير منجومه
غيابه بدون شعور وابعد حراويها

لو ان السوالف عنه ما سمع معلومه
ما يصحي يا لين الناس تومي بأياديها

وينفض يديه وعلته فيه مكتومه
وقام ومكانه فيه الاغراض ناسيها

من اول سنينه والبهاذيل معزومه
على حد صدره شيدت به مبانيها

بنت عرشها وعروش الامال مهدومه
وانا كل ليل اسهر وتصدح بأغانيها

وانا ليه ما اسهر والمحاصيل معدومه
ما عاد ابتهج بالشمس والليل قافيها

تعاف المنام عيون بالوقت محرومه
وتمت على اخر بيت واشوف تاليها

© 2024 - موقع الشعر