من ضيقتي رقيت عسر المراقيب - سالم منيس شكبان

من ضيقتي رقيت عسر المراقيب
في مرقب تصفق عليه الشمالي

وجريت لي صوت يحط الولد شيب
حزين واصفق باليمين الشمالي

عليك يا مسعود دمعي سواكيب
يا شيخ قوم يحتمون التوالي

نبكي عليك ولا علينا بها عيب
مثلك عليه الدمع ماهوب غالي

الطيب نحبه ولو من الاجانيب
وشلون لا صار الرفيق الموالي

تبكيك ناهس مكملين المواجيب
وشهران تبكيك النسا والرجالي

وتبكي عليك الفطر ام العياسيب
جرد الرقاب معبسات الشمالي

كبار الخلاف اللي تملي المحاليب
فنس الخشوم معكرشات العفالي

في شفها منت بتحسب المحاسيب
ياما رعت قفر من النزل خالي

وتبكيك رسلان تصالا مكاهيب
ويبكيك محماسك ونجر يلالي

ويبكيك مسجون حدته المكاتيب
ماله جدا الا قولته عزتالي

ويبكيك مديون همومه محاضيب
ويبكيك عود ما يجي له عيالي

ويبكونك طروش خفاف المزاهيب
ومدور صاليه ما لجوع صالي

ويبكيك غرس له عذوق مهاديب
كل يقول اني اعده حلالي

في واحد وعشرين واحد له الريب
نهار جمعه لا سقاه الخيالي

فيها توفي منقع العز والطيب
مسعود شيال الحمول الثقالي

ارحمه يا اللي تعلم السر والغيب
واغفر ذنوبه يا عزيز الجلالي

وصلاة ربي عد مذري الهباهيب
على النبي محمد اول وتالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر