الاقارب عقارب

*ياللي تقول ان الاقارب عقارب*
*مخطئ تراهم عزوتك ف المهمات*

*بهم يشد الظهر يوم المحارب*
*وبهم تنومس وقفتك بالصعيبات*

*وبهم حياتك تهتني والمشارب*
*ومعهم تحس بقوتك للثقيلات*

*مادمت بالدنيا / فسدد وقارب*
*مالك غنى عنهم قراب المروات*

*تبغى تشككني بعذر التجارب*
*وانك لي الناصح بحكم الصداقات*

*أبوك مهما تكتسي من عذارب*
*الليل يدعي لك وبالصبح وقفات*

*وأخوك درعك والسند والف قارب*
*الصعب يصبح في عيونك سهيلات*

*وخالك وعمك عزوتك بالتقارب*
*وقفاتهم / ماحققتها / قروبات*

*واولاد عمك لحيتك والشوارب*
*العم مثل الاب واولاده غلات*

*واولاد خالك فزعتك للمكارب*
*فالخال والد مايضرك ولو مات*

*ختامها تبغى تشوف الاقارب*
*ناظر يدينك عند رفع الثقيلات*