إبراهيم بنيان

ياللي تبا المنصب وتبغى الزعامة
أنصحك ابعد كان منته بذيبان

ترى المناصب تبغى رجّال هامة
تبغى كما ( إبراهيم ابن بنيان )

الجابري إبراهيم اسمه علامة
من طيب فعله انتقل بين ركبان

فيه الرجولة وفيه نخوة وشهامة
وفيه الفزوع اللي ظهر ذكرها بان

إذا انتخيته جاك رامي العمامة
ما ينتظر تكفى ولا اغد يا فلان

ولا هي غريبة من عدو الرخامة
كحيلان أبوه وهو سلالة كحيلان

اسمه تعلّى فوق رضوى وشامة
مشهود له بالطيب من كل إنسان

يا كثرهم قبلي حكوا عن مقامه
ومن بعد ما جرّبته أحكيبه الآن

ما قال غير ابشر ونفّذ كلامه
مع إن الأعذار عدة أشكال وألوان

ايو الله بأمدح لين يوم القيامة
ونْعم بكم يا آل عمي بنيان

وناويني أمدح ولا عليّه ملامة
لكل من يفزع مع الناس بإحسان