كانت رقم

كانت قصيدة شعر في ليلتي الملهمه
أجزل بيوت الشعر ماتارد الهايفه
كانت حلولٍ تفك العقده المبهمه
مثل النسيم العليل بمرقب النايفه
كانت أمل في حياتي من بعيد أرسمه
ماجات حلم (ن) بعين حلومها زايفه
كانت براءة طفل لو يبتسم مبسمه
يخضر روض(ن) هشيم(ن) الدهر لايفه
كانت رقم في حياتي مستحيل أقسمه
كانت حلاة العمر وسنينه الطايفه
كانت وكانت وكانت شيء ماافهمه
بس الوكاد الجمال وكانت الكايفه
وامسيت والشوق يدمي قلبي ويزهمه
واصبحت والقلب حبه بالعرب عايفه
شيعت جثمان حبه يالله أن ترحمه
اقولها والمشاعر ماهي بخايفه
ماهو بعيب الفراق العيب لو ترغمه
وأنت الذي شفت غيرك مالعرب حايفه
خله يعرف الصقر ماهو بطير أرخمه
يدري بسود النوايا والغدر شايفه