ما همني بدنياي شده ولا لين - زيد عبدالله ابراهيم الحرب

ما همني بدنياي شده ولا لين
الا حبيب القلب سيدي الى بان

قالوا: تحبه قلت ما يعادله شين
حبه رجح بطويق مع ضلع شكسان

قالوا: يحبك؟ قلت: حين بعد حين
حين يحب وحين يكمر بطغيان

قالوا تهابه؟، قلت: حتى الفراعين
من هيبته شفهم رخوم وذلال

الجن ويا الانس بامره مطيعين
لاكن في يمناه خاتم سليمان

قالوا: تطيعه؟ قلت: عبيد مسيكين
عبد يطيع العهم في كل ما كان

قالوا: شراك؟ وقلت من غير تثمين
عقلي وروحي عند مدعوج الاعيان

فالوا: طبيب؟ وقلت: يبري الطواعين
ما صار مثله يا فهد كود لقمان

قالوا: حليه بالملا، قلت: بالزين
باوصاف يوسف خالقه عالي الشان

قد قطعن كفوفهن بالسكاكين
وقالت زليخا، ذا عزيزي يا نسوان

وبقصته مكتوب عم وياسين
وسورة تبارك حرز سحاب الاردان

قالوا: سليله؟ قلت: خمسة وتسعين
قالوا: حسبته؟ قلت ماني بغلطان

قالوا: جبينه، قلت: حورية العين
مدور يشبه كما هلال شعبان

قالوا: عيونه؟ قلت: نادر شياهين
سود هدبها تطعن القلب بالزان

قالوا: خشيمه؟ قلت: سيف السلاطين
في كف نادر واشهره يوم الاكوان

قالوا: خدوده؟ قلت: نور البلادين
هو شمعة الجنديل وسراج دسمان

قالوا: المبيسم: قلت: لوقه اسماعين
عطار يجلب فاخر المسك لعمان

قالوا: عنيقه؟ قلت: خشف بجبرين
يقطف زعهر مالاق له كل ما زان

قالوا: نهوده؟ قلت طلع الباتين
خوخ مخدد يا فهد وسط بستان

قالوا: صدره: قلت: مرمر مع صين
بوصاف صدر الزين ضاعت الاذهان

قالوا: نعيم؟ قلت يا قاه جبرين
لازبد، لا قيمر، ولا هو برويان

قالوا بطينه قلت طول من الجين
طاقة حرير وساميها كل سلطان

قالوا اردرفه قلت الله له معين
من شيلهم الترف كلف وتعبان

قالوا فخوذه قلت مهرة قحاطين
صفرا اصيله تقاد للشيخ بعنان

قالوا وساقه قلت يمار دارين
يشيل عود ناعم جنه البان

قالوا اقدامه قلت ما داس ما يلين
جد داس فوق الزبد حدره ولالان

قالوا كذبت وقلت ماجست انا الدين
أكرم علي ما قلت جور وبهتان

1930 تقريبا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر