يامشعلين الليت

لـ مهدي ال سميطان، ، في الانشاد والشيلات، آخر تحديث

يامشعلين الليت - مهدي ال سميطان

يامشعلين الليت ذاك القمر شل
طفوه تسلى ارواحنا بالقماري

قلوبنا وجعه ولا دمعنا هَل
وكلاً مع ذكرى المواليف ساري

خلوني أسهر لاصديقٍ ولا هل
واشاكي انجوم السما والذواري

الحب جرحً لوعته مالها حل
لو اجتمع له الف كاتب وقاري

والحب سيفً بالشرايين لا انسل
قطّع عروق القلب موت وعزاري

واللي فقد في زحمة الوقت له خل
يصبح أسير للشجن والطواري

ياتل قلبي من فراق القضي تل
تل الصقر لشاف زول الحباري

أمسيت بالفرقا محطم ومعتل
أحساس متذبذب ومنطوق زاري

احن لك يامتعرف العود وأسال
بالي الطلل والحال باريه باري

صحيح قلبي من جموح الهوى مل
وحسمت فالموضوع هذا قراري

لكن يشد القلب للحب لاول
شيً يشد الروح لتراب داري

ياصاحبي الاجمل تفاصيل واكمل
لو كان ماغيرك سبب فنكساري

مانيب من ولدت به امه على الزل
وليا ذرف دمعه لقاله مداري

ومانيب من يصبر على الضيم لا اقبل
لدنقت روسً وطاحت سواري

بس انت غير الناس يالطرف الاكحل
وان عشت بايع في غرامي وشاري

لو كنت طيرً من يدين القفص فل
عن رجعتك مامل طول انتظاري

ولو كنت عرشً من طمع فيه يقتل
طمعت به لو كان فيه انتحاري

ولو كنت وهمٍ من يصدق مختل
ماجزت اشوفك للحقيقه مواري

الكل جزءً في عيوني من الكل
والا انت سيد الكل والكل داري

اني بحبك عن سواك آتبتل
وان الغواني عند حسنك جواري

انت انت حبك شي من فوق منزل
وانا بحبك ماستحي اني اماري

© 2024 - موقع الشعر