رد على العقيد مطلق سعيد الذيابي - رائد العالي

شاش راسي مع تعابير القصيده
يوم جتنا منك ياسمح الجنابي

قمة الابداع وافكاراً فريده
من فرايد مطلق سعيد الذيابي

مرحبا بمهندس الطيب وعقيده
عد وبلٍ هلّ ماه من السحابي

تمدح ابن العم وعلومك سديده
مير خذ مني على قولك جوابي

اتعب الهاجوس واصخر سيد سيده
لادعى الميقاف ماسجل غيابي

كان فكري ماذخر فكره جديده
يستريح الشعر مني وش يبى بي

خاطري نشطان والفرصه سعيده
وانفتح لمعانق الابداع بابي

لجل من بالطيب مليانٍ رصيده
مرتكي للكايدات وللصعابي

مطلق وياسعد من مطلق عضيده
محزمٍ من يعتزي به مايخابي

يطّبخ دمه حميا في وريده
والردى من بينه وبينه حجابي

لاتقدم للمواقيف الشديده
ماحسب للمعضلات ادنى حسابي

أبلجٍ كن الكرم مخلوق بيده
مدميٍ في كل يوم ام النصابي

حي راسٍ يدحم الروس العنيده
لايكل ولا يملّ ولا يهابي

لو ابا اعدد مزاياه الحميده
مايكفّي لو أؤلف لي كتابي

اختصرت العلم في جمله مفيده
جعلني وفقت للعلم الصوابي

القصيد الجزل يزهاك ونزيده
بكرةٍ من ذود متعبة الركابي

© 2022 - موقع الشعر