يالله يا قاسم على الناس مدّك

لـ مشفي الجرواني، ، في غير مُحدد، آخر تحديث

يالله يا قاسم على الناس مدّك - مشفي الجرواني

يالله يا قاسم على الناس مدّك
أنت الذي تقسم معوشة عبادك

تمدنا من باب رزقك وندّك
عن الحرص والنار نطلب برادك

يالعبد لا تبدي على الناس سدّك
بعض العرب ودّه يجوّد قيادك

يمثّل بوجهك دور شخص ٍ يودّك
وبحكي القفا يسعى لصالح لهادك

حربه خفي ودايم الدّوم ضدّك
واليا حصل له فرصة ٍ فيك صادك

على الكلام الشين غصب ٍ يحدّك
يبحث خفاك بشرهته وانتقادك

ولاتفتخر بأفعال عمّك وجدّك
وأنت الذي ما عاد يقدح زنادك

يا صار يقصر عن مردّه مردّك
ما ينفعك تنفيخ طافي رمادك

تفخر بفعل ٍما تحقق بيدّك
تركب على كور ٍ وتترك شدادك

ترى المراجل وقفتك عند حدّك
وبذل الجهود لعصبتك واجتهادك

وترى الكبر بأثناء مسيرك يلدّك
وتبلغ على ضو التواضع مرادك

اللي بداء بالصد باده بصدّك
وعلى رفيع الشان خل اعتمادك

اعنز على اللي يا طلبته يمدّك
هو الذي يكفل شرابك وزادك

وعليك باللي يا نخيته يسدّك
اللي بحزات اللوازم سنادك

لو كان ما بدّه قريب ٍ لبدّك
يسوى القريب اللي يسره عنادك

ومجالس ٍ على النميمه تحدّك
أخير منها عزلتك وانفرادك

بعض المواقف للكتابة تشدّك
تبحث خفيّ اللي يكنه فؤادك

© 2024 - موقع الشعر