مطر جدة

يامرحبا يامطر جدة .. عليك السلام
اقلط على دلة الكذبة وصحن الفساد
 
واشبع وبعْد الشبع نعطيك حلوى الكلام
ونشبّ عود الضمير الين يصبح رماد :
 
ونبخّرك من دخون الكارثةْ كل عام
ونكْسيك بشت الخيانة ب اسم: غرقى البلاد
 
ياضيفنا الغالي ارحب ماعليك الملام
صحيح دمّرت لكنّك كشفت السواد
 
غبت ومنحت العرب فرْصةْ لكبح اللّجام
وجيت والقمح باقي تحت سرب الجراد
 
هذا سياج المحاكم ياصبيّ الغمام
وصلت له وبيدَك حجّةْ وصكّ اعتماد :
 
العدْل والفصْل من مستلزمات السلام
والحزم والعزم من مستلزمات الجهاد
 
انفكّت اقفاص مقفولةْ وطار الحمام
ماهي بمرّةْ عشان نقول : كبوة جواد
 
السالفةْ / سافلةْ .. والصمت ماهو حرام
والمعذرة والسموحة يارفيع العماد
 
يجبرني الواقع المؤلم ..ومسك الختام:
انّ الأمانةْ عجز لا يحتملها الجماد .!