تصوري

لـ عواد الهران، ، في غير مُحدد، آخر تحديث

تصوري - عواد الهران

غصت بحياتك غوص مهو سباحه
وعرفت من انت ومنهو تكونين
 
وكنت انتظر والقصد كله دماحه
غديك لفكاري وعقلي تعرفين
 
وراجعت مع قلبي اعدد جراحه
قمت اسأله:عن السبب والبراهين
 
القلب جاوب والعباره فصاحه
واتهمك : انك تجهلين القوانين
 
يقول لاتهمه.ولاهي اطاحه
حقيقتك من غير شكاً وتخمين
 
قلبي يدور وين يلقى صلاحه
بعيد عن من يطعنه بالسكاكين
 
يقول حبك مابقى له مساحه
ولا عاد له حسبان ولا موازين
 
يقول في دنياك ما شاف راحه
ودربه معك تقول سكة مجانين
 
الحب عندك تسليه مع سياحه
ولاعاد له روحاً ولاله مضامين
 
ولا معاني ولاحتى ملاحه
ومشاعرك صارت بليا عناوين
 
واللي يتكبر والتعالي سلاحه
فرقاه مطلب ثم نقول آمين
 
تصوري حباً بليا فتاحه
تقول شيكاً بس من غير تأمين
 
وتصوري حباً بكامل نجاحه
تصوري يكرهك من هو تحبين
 
وتصوري ماقال قلبي بصراحه
(كوني لسان الحال وش لي تقولين)
 
عواد الهران
© 2024 - موقع الشعر