بعض العرب

بعض العرب مبداه ثم ان شعاره
"كن مسلماً بالقول والفعل يحويه"

صدوق يومنه يقول العباره
ماعنده الا الحق ولا ايداريه

حبه على وضح النقاء به حراره
كنه اخوك بصدق يومن تخاويه

شبه العلم والا شبيه المناره
حوى الادب والعلم ورمزاً اسميه

هو الذهب صافي وثابت عياره
كل المعادن لو بدت ماتساويه

وبعض العرب ضاعت مبادي مساره
والاستقامه ماتجدها بهقاويه

الكذب طبعه ثم كامل اخباره
يزيد وينقص على قول راويه

حبه لحاجاته وفيها حقاره
مهما اكرمته منكراً انك تعطيه

ماهو معروفاً بين ربعه وداره
جاهل وبين الناس الكل ناسيه

لونه ذهب لكن هو استعاره
صدا حديداً لو تمعنت خافيه

بعض العرب الطيب والكرم كاره
فطره وتكويناً وهذي مباديه

حكيم في رايه ورايه اناره
كل الفوائد تحتويها معانيه

حظيظ من خاواه او صار جاره
مايلحقه ضيماً ولا شيء يشكيه

لو كان من حاله يمثل حضاره
دنياه لاجل الدين وهذي مماشيه

يعيش في دنيا حوتها الطهاره
واللي انكتب من خالقه دوم يرضيه

وبعض العرب بخيل وماله صداره
رذايل الاخلاق متجمعه فيه

لاناصحاً ولا صلح لاستشاره
مايجي منه شيء ان كنت راجيه

لصرت جاره قلت لاواخساره
تصير شبهه ويلحقك من بلاويه

عقله دمار وباع كل اعتباره
من سيء لاسواء مع تزايد مساويه

يعيش في دنيا طعمها مراره
ماهو قنوع بقسمة اللي امشافيه

عواد الهران