دنيا وفيها

دنيا وفيها غالباً ثم مغلوب
وفيها الثمين وفيه من كان هايف
 
واللي عرف دنياه اكيد موهوب
انه مسافر ثم في حكم ضايف
 
والحب فطره للمخاليق مرغوب
والكل في دنياه للحب حايف
 
والكل منا يبتغي خل محبوب
ويختار من هو بالتواصيف نايف
 
وانا اخذ قلبي وسرا بيه رعبوب
امجمله ربي بزين الوصايف
 
هو الامل وبعالمي كل مطلوب
ابيه: من غيره انا اكيد عايف
 
شفته صباح العيد لحظات يادوب
امعايداً قرايبه والولايف
 
ثم ان تبسم قال: تراك محسوب
ممن نعايدهم...ولو هي جزايف
 
وكنه تندم..مابها شك وكذوب
(عض اصبعه بين الشفاف الرهايف)
 
نغم ملحن انتجه راقي اسلوب
صفة كلامه....مابها من كلايف
 
كنه مصنف ثم من بحث مكتوب
واللفظ شهد اً وانطقته الشفايف
 
والقلب مال وسرع ماصار مجذوب
جذب الرشا.وصارت عروقه تلايف
 
وعينه اترجم سر في خافي قلوب
والصدق بيّن حيث ماهو بزايف
 
نظر وعينه كني ابوسطها اذوب
عزيز ياخر شخص من كنت شايف
 
ليته عطوفاً مابتغي يكسب ذنوب
وليته يخلي امورنا بالنصايف
 
وياخوف عيني كان وراه ملعوب
وش حالتي؟؟ كان النهايه: حسايف!
 
عواد الهران