ضاعت البسمه

عزيل قلب(ن) به جروح(ن) عميقه
عيت تطيب وصابني منها اضرار
 
احترت مثل اللي مضيع طريقه
لامن دليل وصرت بالحال محتار
 
والحال ماعادت لشي(ن) تطيقه
كني بغابه كلها وحوش واخطار
 
ياصاحبي اسمع كلامي دقيقه
صور بعقلي اعمت القلب وابصار
 
شيء مااحد يبغاه في هالخليقه
لكن نشوفه...نسمعه واكثره صار
 
اوجزه حيثه صابني منه ضيقه
حاله:وتبغى بحث واعادة انظار
 
واليوم يامصعب كلام الحقيقه
اللي توضح كامل العلم واخبار
 
الصدق كنه صار تحفه عتيقه
(تراث) حتى صاحبه صار تذكار
 
من قال رايه ياكثر من يعيقه
كن الصراحه اصبحت منطق اشرار
 
صار النفاق مجاملات(ن) تسيقه
لاهو بعيب(ن) ولا نقوله عار
 
مصالح(ن) واللي وراها حريقه
لافيه قانون(ن) ولا مبدا احرار
 
حتى التعامل بين خل وصديقه
صارت على الوجهين طريق منشار
 
صار الصفاء والود باهت بريقه
يافطرة الانسان صارت بلا انصار
 
ضاعت البسمه عقب ماهي رقيقه
تبدلت: صارت تجهم بها اسرار
 
حتى الوصل بين الاخو مع شقيقه
صارت مع الموسم ولو كان هو جار
 
هذا القليل وشيء مانستليقه
يالله حسن الخاتمه وانت غفار
 
عواد الهران