شارون عصرك

يازين يكفي ماسمعنا من اعذار
وهمتني يوم اعتبرتك مثالي
 
يوم اتذكر ماجرى بحالتي وصار
اشك عقلي كن صابه اهبالي
 
وهموم قلبي بالوزن وزن قنطار
اعيش حاله مثل وصف الخيالي
 
حيث الحقيقه مابقى بيننا اسرار
حيث الحقيقه مانت خل (ن) موالي
 
ناديتكم مره ومره وتكرار
رد الصدى يوم الجواب استحالي
 
بيني وبينك وقفة(ن) مالها اثار
وحبل الوصل مابيننا صار بالي
 
لاضو لاح وبارقك مابه امطار
سحاب صيفاً او سراباً بدالي
 
حاولت ادور معك او منك تذكار
خابت ظنوني واعتبرته خبالي
 
وضاع الامل واقر ماقلت باقرار
وداً بلا مدلول ماله توالي
 
ذبحتني والحقت بحالتي اضرار
واللي فعلته صار فوق احتمالي
 
انا ضحيه وانت مجرم وجزار
قلبك من الرحمه فراغاً وخالي
 
جسدت كلمة مجرم الحرب باصرار
اعلنتها:قصدك تريد اغتيالي
 
وصفك تعدى وصف هتلر وتتار
بحت الحرام وقلت عنه حلالي
 
قلبك صخر جلمود..قاتل وجبار
سفاح متلذذ بطرق النكالي
 
شارون عصرك والجرايم بدت كار
حرب الاباده منهجك..واحتلالي
 
عواد الهران