سكان جسمي

لبارحه جتني رساله قصيره
قصيرة(ن) مع مفردات(ن) كبيرات
 
كلام موجز والمعاني غزيره
تفسيرها يحتاج جملة سوالات
 
وبين السطور علوم والله كثيره
بين السلام وبين قولة تحيات
 
قالت : اعرفك صرت بيكم خبيره
مصادري عنك تراها كثيرات
 
ماهي بمقصوده تجيني وفيره
لكن جتي دون اي رشاوات
 
ومدري لقافه او خطط لي خطيره
ابي احتفظ بيها وليا خيارات
 
واللي حدث اكيد ماهو بغيره
حتى الطريقه مهي زرع العدوات
 
عنواني واضح والاسم مستعيره
انا اخترته من سجل الاعارات
 
وانا تراني من بنات الجزيره
شمال غرب المملكه بي علامات
 
وختامها يالله تكون خيره
وخلك وسيع البال دون انفعالات
 
يابنت ولعتي بحالي سعيره
ماعلم ياتينا بليا رقابات
 
والعقل كنه صار بليا بصيره
والقلب تاه بدرب كله متاهات
 
عقلي وقلبي ابحرن وسط حيره
من اللي وصل علمك لانه اشاعات
 
عايش بحالي وانا لعمري اديره
اعيش دنيايا وليا صداقات
 
والحب له قانون....وانا نصيره
وابسط قوانينه..صراحه وامانات
 
في عالم الاخلاص نفسي جديره
حتى الوفاء اخذت لاجله وسامات
 
صريح مع ربعي سلوكاً وسيره
وصريح انا مع لابسات العبايات
 
لاني بمجرم ولا خاين عشيره
ومالي ملفاً في سجل الجنايات
 
انام ليلي وانا عيني قرير ه
عندي احترام الذات وكل القناعات
 
وسكان جسمي من عقل او ضميره
وحواسي(مابينهن من خلافات)
 
اما الوكاد احتاج من هو استشيره
مختص(من يلبس وشاح المحامات)
 
اشرح له الموضوع ..هو من يثيره
من اوله لانقص ولا زيادات
 
امفاوضات..وطاوله مستديره
ومحاكمه في عرف كل النقابات
 
وموضوعها يصير قصه شهيره
وانت المسمي وسمها بالاجابات
 
سرقه تهدد قلب وكامل مصيره
رسالتك دليل وفيها اعترافات
 
عواد الهران