جتني..تعاتبني؟

جتني تعاتبني على شيء ماصار
قلت: اسمعيني والامور استشاره
 
عيت وقالت: وش بقى عندك اعذار
قلت:(الصحيح)وثم(صدق العباره)
 
ماصدقت..قالت:مابي منك اخبار
وفَر كلامك. ماانا بانتظاره
 
ثم ان مشت.ومكرره قول (غدار)
الحكم ظالم جايراً في قراره
 
تاهت حقيقه مع تلاوين الافكار
اكيد وقفه تستحق استخاره
 
ادري ان الحساد اعموا لها ابصار
حطوا رقيباً ويتجسس اخباره
 
صاروا اصحابه ثم للبيت زوار
ومسمميناً قول كله اثاره
 
صدَق عصابه كلهم زمرة اشرار
اللي استغلوا طيبته..في نهاره
 
وبيتي وبينه شيدوا عدة اسوار
وسور المشاعر ثم سوراً لداره
 
وذابت البسمه وانطفت كل الانوار
والشوق مات ومابقى به حراره
 
انا عذرته رغم جمله من اضرار
وانا عذرته رغم كل المراره
 
لعل يوماً تتضح بيه الابصار
والصدق يعلن للملا: بانتصاره
 
ويدري باني صادقاً ثم صبار
واعيش انا واضح بدنيا الحضاره
 
ولعل يدري الوفاء هو لي كار
وحبي ماهو سلعه ولا هو تجاره
 
واني مع اللي احب ماعندي اسرار
واني من اللي يستحق الصداره
 
عواد الهران