ضيم الفقر و الغرابيل - أحمد الأسلمي

نصبر على ضيم الفقر و الغرابيل
ونضحك وحنا خالياتً يدينا

نرثع مع الدنيا عشان الرجاجيل
ونشفق على الطيّب و لو ماحكينا

ياما شربنا من قراح الشهاليل
و العكس لا قلنا شهاليل طينا

يحدنا القرد المتنّح على الميل
نخطي وحنا بالخطا عارفينا

حنا بشر لو تكّثرون الأقاويل
امعرضينن للخطا مذنبينا

لكن بنا عزه عن القال و القيل
نموت ما نلمز رفيقٍ يجينا

خوينا لا من حدته البهاذيل
يمكن على شانه نضحّي حدينا

لو الحقيقه حظنا سبة الويل
لكن من الله نرتجيها تزينا

عسى الحظوظ اتشيلنا بالمقابيل
وتصبح معانا عقب ماهي علينا

© 2024 - موقع الشعر