تداحم افكاري على بدعة القاف
مثل الضوامي فوق عدّ الضوامي
هداج راهي مانقص منه مغراف
لاهنت ياهاجوس مرو الحيامي
مااقول انا مطلق ولااقول صياف
لكنّ تلميذ لرشيد الزلامي
اليوم ميقافاً مهوب اي ميقاف
ميقاف ابن عمي رفيقي حزامي
ابن صليح طيب الصيت نواف
واخوه سامي كفو لاقيل سامي
احرار من قوماً لهم فعل ينشاف
نعم الرجال الطيبين الحشامي
عيال قرماً له مكانه ومضياف
اسمه نعده مع كبار الاسامي
صليح اللي يدهل الصعب ماخاف
صليح الوافي صليب العظامي
للي لفو من طيب وقلوباً نظاف
اقول بسم اهل المقام الكرامي
يامرحبا ترحيبة شيوخ عرّاف
الله يحيي من يرد السلامي
يامرحبا عد الكواكب ومن طاف
من طاف بيت الله ولبس الحرامي
حياكم الله يانقيين الاوصاف
لبيتو الدعوة قدر واحترامي
محفل سباتين المروه والاعراف
اهل النقا يوم اللقا والخصامي
علومهم ماترجع ارباع وانصاف
سقم الحريب ومحتمين الجهامي
الاد رايل حققو كل الاهداف
رفيقهم طول الدهر مايضامي
نسل بدوي قوماً على نهج الاسلاف
عدوّهم ماذاق حلو المنامي
منابع النخوة واهل عدل وانصاف
تاريخهم نوراً يفجّ الظلامي
وختامها مبروك يالقرم نواف
ومبروك يانسل الحلاحيل سامي

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر