غربة وترحال - رائد العالي

راحت سنين العمر غربه وترحال
البعد شيّب روسنا مانقلنا

في كل عام نجدد آلآم وآمال
تجديد املنا عقب تبديد املنا

وزارة التعليم ماتجهل الحال
ياما طلبناهم وقلنا وقلنا

نبغي جواباً واضح يحل الاشكال
متى نبي نفرح وننقل لاهلنا!؟

لاتصبح الدعوى تجاهل مع اهمال
ضحيته حنا وناتج عملنا

معلمين وجهدنا ينتج اجيال
الله جعل للعلم فضلٍ شملنا

على يدينا تثمر عقول الابطال
نبذل ولو ان الظروف تخذلنا

مهنة معلم دون تعظيم وإجلال
تعني فشل للمجتمع من فشلنا

أول معلم صفوة الخلق مازال
علمه مناهل نور منها نهلنا

بلا معلم يصبح الجيل جهال
ماللجهل رادع حقيقي بدلنا

واذا انكر المعروف جحّاد الافضال
حنا العمى وهو العمى ماجهلنا

الله يساعدنا على كل الاحوال
والله يوفقنا وننقل لاهلنا

#رائد_العالي
© 2024 - موقع الشعر