حفل الاستاذ مشهور الثبيتي - رائد العالي

ماعن مواجيب النشاما معاذير
العذر في الماجوب عيب ونقادة

ابا اتقدم واصخر الشرد تصخير
حشمة قروماً فيهم الجود عاده

يامحزمي مشهور مسيت بالخير
يادرع جنبي ياقويّ الإرادة

مشهور له عندي مكانه وتقدير
حراً ولد حراً ينومس هداده

مشهور من روس الرجال المشاهير
عوق الخصيم اللي قوياً عناده

ابوه قرماً شامخاً كنه النير
فعايله ماهي بحاجة شهادة

محمد الزيزوم ريف الخطاطير
حكمه وعرف وطيب راي وركاده

بيته مشرع للوجيه المسافير
يقلّط لضيفه من الحيل زاده

ابو فهد يزهاه جزل التعابير
حيثه على عرش المراجل شداده

ذوي سهل نعم الرجال المناعير
كلاً على الطالات يقدح زناده

نسل الجوازي محتمين المظاهير
عدوهم مايهتني في رقاده

في اليسر ولا في الليال المعاسير
ترى الجوازي كاسبين الريادة

من عزوة ثبيت السيوف البواتير
مرجع عتيبة والفخر والسيادة

اللابة اللي ماتشبّه على الغير
فيهم على صكات بقعاء جلادة

ثبيت لاصكت جموع الطوابير
أيمانهم تضرب بليا هوادة

أدنى ثبيتي مايجي منه تقصير
يحري على الهقوه ويرقى زيادة

وقبل يقف قاف القصيدة عن السير
ياللي زرعت الطيب تجني حصاده

مبروك يامشهور نسل المشاهير
عسى حياتك كلبوها سعاده

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر