من دون ذكر اسماء - زايد الرويس

ياما كثير اسماء من عيني تطيح
من ناظري .. والا من القلب .. سيّان

من دون ما اذكرهم ومن دون توضيح !
لكنهم كانوا قبل فترة اخوان

قريتهم يوم كتبوا كل تجريح
كتبتهم يوم انفضح كل عنوان

غنيتهم والليل باسراره يبيح
موّلتهم .. ميّلتهم ...مال ميزان

جمعتهم للغيم .. عن قصة الريح
يوم انثرتهم قلت مانيب خسران!

تصريحهم تلميح !ماهوب تصريح
فيهم وفا ! مابين قوسين (خذلان)

ياما اغرقوني من دموع التماسيح
من زيفهم .. وبكيفهم صرت غلطان

فيهم من الهقوات ما يقهر الشيح
وفيهم من الهفوات وقفات عدوان

ياهم على كثر السوالف طحاطيح
وان جت على افعال الرياجيل نسوان!

هذا الزمان اصلاً زمان المشافيح
ما تحتويهم قافيه .. خل الاوزان

إن عذربوا بي سقت للرب تسبيح
وان امدحوني قلت مافيّ نقصان!

يكفي بظلماهم حملت المصابيح
ويكفي عن الشمس يتوقوني اغصان

من دون ذكر اسماء ..من دون توضيح
من كثر ما استوعبت ما استوعب الآن !

مافيه يوم الا وبه صاحب يطيح
وانا ابتسم لا طاح واقول سيان

© 2023 - موقع الشعر