المسافر

سقت همي يم قافي والعقل شد الرحايل
من بلاه اللي كسر درعي وشيّب منه راسي

كنت اخبر اني على حمل الودايع والثقايل
والعسيره والمنيعه ازيلها من حد فاسي

قلت اسافر مع بحرها والتزم كل الوسايل
واستزيد الصبر لين الصبر يوصلنا المراسي

مثلنا مثل الذي حاز التصدر عالاوايل
والتفوق بالنتايج طول ممشاه الدراسي

لافتة دربي رجال من السلف واهل المثايل
منهم امتد العزم واهد صخرة كل قاسي

ما نعرف نقول صعبه للشدايد والهوايل
راس مالي همتي تصمد وتوقف كل خاسي

يا منال الطامحين اللي مع العنوه عدايل
ما هقيت ان الطموح يهد من حيلي وباسي

ما خبرت الهم قبل الليل الا هم زايل
لين خطت دمعتي مجرى وأجرتها المآسي

قلت اقول لها عوافي واتمسّك بالجمايل
قمت اشوف البال شارد والهمم جاها النعاسي

والتدارك يا مدارك واعتزي يا ابن الحمايل
مرتن نغلب ومره عند صاحبنا المواسي

لحظتي كنها تذوقني العطش مع كل مايل
ولا غرفت الماء بكاسي طاح من يدين كاسي

قمت اهوجس واستعير الفكر من همه قلايل
واتفكر بالجبل شامخ وبالزعزاع راسي

والزمن لا من وضع بيني وبين الحلم حايل
صرت افكر بالعروق اللي ارتوت عقب اليباسي

هاجسي واعذب حروفي إن سرت مع كل قايل
في خفاها قصة اللي طق خمسن في سداسي