شيوخ الفتاوي - إبراهيم محمد البجيدي

هيه ياللي تستبيح الذنب غاوي
من قديم الهرج ولا من جديده
 
دام تخلط بالتعازي والعزاوي
نقصك اللي بان ماتقدر تزيده
 
مانت والله وارد العد الرهاوي
ياولِيد ٍ ماهو مسمّى ولِيده
 
قبل تنشد عن شليويح العطاوي
ليه يوم تعشي ضيوفك عصيده
 
مقتدر بالمال مير الطبع شاوي
كم فقير ٍ واجبه للضيف عيده
 
جل رب ً فارق الحر النداوي
عنك يا بوم ٍطفاس القاع صيده
 
مثلك اللي شوره لهند ومضاوي
ضعف نفسك في علاقتك الوطيده
 
ياوجودي ليتها شيوخ الفتاوي
تفتي ان ذبح الردي خصله حميده
 
كان مبطي راس مقطوع الرجاوي
ذمة السيف الحدب تبتر وريده
 
الردي ماينفعه طب المكاوي
ما يفيده لو يكوّى في حديده
 
اتفكّر في حكم شعر الخلاوي
عن بخيل المال في معنى قصيده
 
جعلني لاطحت ماطيح متساوي
بعدها بيتين ثم فرصة سعيده
 
مانخاوي الا بعيدين الهقاوي
ومن يقدّم طيب يبقى في رصيده
 
المراجل ماهي ببشتٍ حساوي
لو صورّك فالمجلة والجريده

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر