زرار الصدر

وا عذاب اللي لا مره ما يضيمه
قفل ازرار الصدر واشتال همه

حط تاليها على حزمه قديمه
شاب راسه ما هدر للوجه دمه

ما انحنى راسه على مر الحريمه
ما نطق تكفى لو انها لإبن عمه

لا استراح وسجته نيه سليمه
يفزعه شيٍ يختله ثم يخمه

وين رايح والهموم ابطت مقيمه
ثم فكر في خواته كيف وامه

إيه بلحاله على ضيم وعزيمه
ذاق مر الوقت والسم استشمه

عاريٍ صدره على ذب الخريمه
ما سند ظهره بمحزم مايزمه

اصغر همومه يبى رجلٍ صتيمه
واكبر همومه تربع راس قمه

ما رضى بالذل ووجيه الهضيمه
ساق رجله في الخلا في كل يمه

كن صوته للرعد لأزعج هزيمه
في بقاعٍ خاليه من كل ذمه

هيه لو كل النوايا مستقيمه
كان يارد كل ضامي جال جمه

واقفت اقدامه وصدره من نهيمه
ارجفت له من ضلوعه قدر غمه

وامست الدنيا على مر وظليمه
قد ما استحكم زرار الصدر سمه