زرار الوصـــل . . . !

يا هاجسي وين بلقى فيك مُتنفّس
شاعرك أصبح بريٍّ من معاليقه

ترى الغلا يموت والاشواق تتيبّس
لا صار مافيه من يحفظ مواثيقه

علم هوانا ثلاث اعوام متنكّس
والعذل مشى على الصده تلافيقه

محبوبتي .. والمشاعر كيف تتكدّس
وانا هجرت الشعر و احلى طواريقه

ماني فقلة ظهوري خايف افلّس
الخوف من صبح ما يصحى على ريقه

فكّي زرار الوصل .. خلّيه يتنفّس
مخنوق من سبة الحرمان والضيقه !

ماني على البعد متدرّب ومتمرّس ..
وانتي تلفين في أصعب طواريقه !

حني على القلب .. قد له عمْر مانفّس
إلين ترهى على صدري مواريقه

تعالي الحين قبل الحلم يتيبّس
الحلم باطل .. بليا روح تحقيقه