واحد وضيعني الحكي

يسعد صباح اللي سكن في داخلي وسط الحنين
مسيك يا اغلا من لجا بين الحنايا والشعور

لك من سمانا امطرت ورد وزهور وياسمين
وازهر على قلبي الفرح .. نور حياتي بألف نور

قالوا ويمكن اصدقوا .. من الشبه خلق اربعين
إلا انت واحد بدهم .. ما يشبهك غير الزهور

من يشبهك يا سيدهم .. يا النادر الحر الثمين
فضنا قصايد واغرقت من وصفنا كل السطور

يضيع في وصفه الكلام .. عينه ورمشه والجبين
وحروفنا مثل الغريق تلعبه أمواج البحور

يا اصدق حروف (ن) قلتها .. يكتبها هالشوق الدفين
واجمل معاني صغتها .. يرسمها وجدان معذور

يا غالي(ن) كثر الذهب .. واغلى بعد مثل اللجين
ذوق وادب ما ينتهي .. تبهر بطلته الحضور

لك في خفوقي منزله تبقا على مر السنين
غالي وأغلى من عرفت .. متربع (ن) وسط الصدور

ما ازهد ابد في عشرتك لو تزهد الأم بالجنين
واللي على العشرة يجور .. موعده في يوم النشور

يا الله يا رب العباد .. يا مرسي لنوح السفين
تسعد غناتي وتبهجه .. وتزيده أفراح وسرور

واحد وضيعني الحكي .. وشلون لو منه أربعين
يموت حرفي وينتحر وتتلاشى ألفاظي وتبور

قلت وقصيدي انكسر .. واصبح لحضرتكم مدين
مهما علا في وصفكم .. يبقا معاكم في قصور