محتاج لك..

لـ الريم الشحي، ، في غير مُحدد، آخر تحديث

محتاج لك.. - الريم الشحي

محتاج لك..والحاجة أم الإختراع
يا لعن بو حاجة تذلك ف الهوى

لكن فؤادي بك أمر..وهْوا مُطاع
لبيه دام القلب ينشد بك دوا

مشتاق لك..والشوق بي بيّح وفاع
يا بعد كل ناسي ضنينك مَ ارتوى

خذني على دنيا بلا هجر وضياع
فيها المحبة راقية ف المستوى

تلقاني لحبك خضوع وانصياع
وأرهن حياتي لجل ما نبقى سوا

ياللي على بعدك سنيني في صراع
عنوانه الشوق وقصيدي محتوى

تدري وش أصعب شي إذا حان الوداع؟
إنك تكابر دمعتك رغم الجوى

وأرحل وأنا كني سفين بلا شراع
في ليل م القا به سوا عينك ضوا

أتبع دروب الحب في جمر إلتياع
يطوي السنين الهم وهْوا م انطوى

وأجامل القسوة على شط الضياع
يمكن على ذكراك أنا أنسى النوى

وأوصل بحر وصلك بلا زاد ومتاع
أشكي لك الفرقا وكل اللي استوى

ويضمني كونك على صدرك ذراع
كنّي طفل..ع مفارق أمه ما قوا

خذني ب روفك سيدي بالمستطاع
ودّي تعيشني تفاصيل الهوى

محتاج أضمك يالغلا قبل الوداع
أخاف أموت وخافقي بك م ارتوى

(رقية محمد الشحي)
© 2024 - موقع الشعر