العشق الدفين

ما يقصر لساني اذا تقصر يدين
في مجتمع خاوي من المتفاهمين
 
عقلٍ خلق له في زمنّا مشكله
ما يحلها الا عقول القادمين
 
اكبر مشاكلنا نحارب نفسنا
ونعاند وحنا بغلطنا عارفين
 
ب( الحق ) والا ب( الحقيقه ) نختلف؟!
اكبر مشاكلنا سبب هالكلمتين
 
به ناس واجد مستعاره كلّها
افكارها و احساسها عن آخرين
 
تنقل مقولات البشر عن نفسها
تستهلك انفسهم وهم مستهلكين
 
تجنب الطوباء وقت المعرفه
حنا من افكار القُداما ناشئين
 
ما علمونا " الشك " اصل المعرفه
هذا سببنا ف إتباع الاوّلين
 
يمكن قبل عصورنا بس اذكيا
اخترعوا غباوه ل الضعاف الخايفين
 
كل شي جايز بس مو جايز يكون
في جيلنا من الف ١٠٠ ديّنين
 
تطوّروا فالغرب اكثر مننا
تمدّنوا و حنا بعد متمدنين !
 
اللبس ضيّق منكشف عن عورته
هذا التطوّر اللي حنا شايفين
 
العيب مدري من تطوّرهم او ان
العيب بعيون العرب متلهّفين !
 
يا صغرنا لا ضاقت الدنيا بنا
والضيقه اصلاً كلها سبّت حنين
 
اما فراق او غيبه او ضيقة صدر
ونقول : ( يا ربّي متى موتك يحين )
 
الحزن : في مفهومنا اصبح ملل
حنا اساساً في ترفنا عايشين
 
ما نشكتي امراض او رزق وغثا
افراح لكنها كذا نفس الروتين !!
 
عطيتنا ياربنا من كل شي
اشياءنا تكمل سوا من حاجتين
 
الامنيات و ضيقة الدنيا بنا
حنا لهالحاجات صرنا سائلين
 
الناس تتمنى لو ان فيه امنيَه !
مافيه شي الا و حنا ماخذين
 
ودْنا لو انا ننحرم حتى نعيش
على كمال اللي به احنا ناقصين
 
نخلق مشاكلنا و مشاكلنا عدم !
بس ودّنا نجرب شعور الضايقين
 
كأنهم بأفعالهم يترجمون :
( يارب حنا من العطا متمللين )
 
الحمد لله عايش ب خير و نعيم
امان لو ماشفت بالعالم امين !
 
الا اني اكثر شخص يعشق وحدته
ويدوّر احزانه تجي لقلبه منين ؟
 
حزني مثل اسمي انا مَ استخدمه
احسّ في ذنبي لاشفت المذنبين
 
اضيق لا شفت الردي يبقا ردي
طيّب و احب الناس مثلي طيّبين
 
و اضيق لا شفت العذارا غازلوا
في عيني اكبر من سقوط المسلمين
 
طهارتي سبب معاناتي لذا ..
ما يشعر بحزني سواء الطاهرين
 
يارب انا عبدك ابي تحرمني من
لذّة معاصيك ودروب السيّئين
 
لانسان عمره يعتبر عن تجربه
للي بعد ما مات ، باقي عايشين
 
لو تِعتبر باغلاط غيرك فالحياه
من فوق عمرك ضفت عمر الميّتين
 
ياليت اعمار البشر لو تنعكس
نولد كبار ، نموت حنا صغيّرين
 
عشان نعرف وش علينا وش لنا
ونعيش وحنا مْن الخطا متعلمين
 
ما ناخذ الصفعه من الدنيا ولا
يضحك علينا كل شيطانٍ لعين
 
احس دورات الزمن كما هيَ
اللي حصلي حاصلٍ قبل لثنين
 
نفس الحياه باحداثها بافعالها
يمكنّهم اكثر على مر السنين
 
حنا نتكرر فالقدر ب آلامنا
وافعالنا مَ احنا بها مكررين
 
لله حكمه يمكن ب تكرارنا
يشوف من فينا على الله يستعين
 
الناس لو مديت ايدينك لهم
تردهم لكن عراة و خايبين
 
الناس تستضعف بعضها لا املكو
والملك كله ملك رب العالمين
 
الا فتاة احلامي لامنها ملكت
قلبي ، تدللْه و تسوقه للحنين
 
تهيم بي فوق الظروف القاسيه
و اعيشها لحظة معاناة و ونين
 
ماشوفها ولاني باسمع صوتها
عفيفه و ياكودنا ( متراسلين )
 
العشاق دايم في بعضهم يلتقون
احيان اخجل من طواري العاشقين
 
مدري انا المحروم من عشقي او ان
حب التفاهه غير حب الصالحين
 
اعيش معنى الاضطهاد و انسحب
لا من تشارك داخلي عشقٍ ودين
 
احبها .. لكن علي ( مُحرّمه ) !
اعيشها بأحلام و اوهام و أنين
 
اغض عيني عن طيوفه و انحرم
يا جعل ما تبكي من الاشواق عين
 
يارب آجرني على صبري انا
تعبت ادوّر لي من العالم عوين
 
يارب تغفر لي و تسترها علي
ولا تحاسبني على ( العشق الدفين )
 
قلبي لو انه يعشق اللي يعشقه
ما تملك ايديني على ردعه كمين !
 
ف لا تُحاسبني بما لا املكه ..
انا على قلبي فما عندي يدين
 
احيان من ضعفي وقلّت حيلتي
ودي لو انه ما انولد فيني قرين
 
احسّني ظالمْه بإحساسي و انا
مُتعب من العالم و من عقلٍ فطين
 
فإذا قدرت اصبح غبي ف وقتها
يمكنّي اعرف ليه انا اصلاً حزين