عقب البطا - عبدالله خالد البكر

عقب الغياب يعود للشعر ميعاد
الله على وقت البيوت الجديده

ياهاجسي عقب البطا هات الاشهاد
عطني من الدرّ المرصّع فريده

بنات فكري كلّ ما خاطري جاد
تقلّطن مثل الصفوف العديده

وانا احمد الله كل ما هام بي واد
شاعر يغذّي بالمعاني وريده

شباب عُود وفكري العود معتاد
على الجسام المعضلات الشديده

احيان تطرقني صواديف حسّاد
و الوذ بالله عن صوادف عبيده

وان كان بي شوقٍ على القاف يزداد
دايم عضيد القاف يوفي عضيده

حَميده تغنّي على شان حمّاد
وحمّاد يطرب لا تغنّت حَميده

ما جف بير ولا يبس غصن ورّاد
مادام من نضحه غديقٍ يريده

© 2024 - موقع الشعر