سبة زمان جاد واغنى الصعاليك

لـ ، ، في الحكمه والنصح، آخر تحديث :

يالله ياللي نلتجي لك وندعيك
يا واحدٍ من فوق عرشه تعلا
تلطف بحال اللي خشع لك يناجيك
يوم العباد خشوع بالنوم صلا
يشكي عليك ويستعينك ويرجيك
بالصبر في صلف الشدايد تحلا
البارحه ضاقت عليه المساليك
وهمه على عوج المحاني تولا
من كثر ما تدوي عليه الدواكيك
كن الكرا عن موق عينه مجلا
سبة زمان جاد واغنى الصعاليك
وقصّر مع اللي يلحقون المخلا
يا وقت كم لي صابر لك واناحيك
وانته على لوعة ضميري تسلا
حيرت فكر اللي بعزمه يلاويك
وبيحت صبره بين لولا وكلا
ويلومه اللي من خلق ما شقى فيك
حاشي ربيع باخضر الروض فلا
راع المعزه لو يشوف التهاليك
دلوه على عد الردى ما يدلا
والله ما يدمي ضميرك ويكويك
ويصير صدرك فوق نار يصلا
الا ليا صكت عليك الشرابيك
وعنك الرفيق اللي ذخرته تخلا
وقت الرخا في كل الايام ياتيك
وعقب بغيته ساعة الضيق ولا
لاشك جنب من يخيب هقاويك
واصبر عسى نور الزمان يتجلا
اعرف وميز كل رجل يخاويك
ولاتنخدع في كل هرجٍ محلا
دورات بقعا تخبرك عن مصافيك
لو انه ابعد من عدن والمكلا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين