حضور غيابك

في غياب حضورك..أضناني حضور غيابك
دلني ياواحد(ن) مالي غنى عن ذكره

لا قفل حظي وزرفل دون وجهي بابك
قلت ياقلب العنا صبرك..وعَدْنا بكره

لايعذبك الجفاء.. والحزن لاينتابك
واكتشفت انه على ذا الحال دور المَكره

تبّت يدين الزمان اللي عليّ ابطى بك
والفراق اللي حدى قلبي على مايكره

قلت (ا)بسلى عن مظاليلك وسود اهدابك
وإن سليت شوي عن طاريك..أعود افتكره

مثل طير(ن) تقنعه قولة "وكَرْك أولى بك"
لو يطير وياصل القمة..مردّه وكره

أذنبك قلبي.. ولاربي هداه وتابك
والعفو ياخيرة ذنوبة.. ويامحتكره

كلما ريح الصبا هبّت بعطر ثيابك
يسكْره عطرك..ويبطي ماصحى من سكره

شاعرك لو ماصدح باسمك ولاغنّابك
ماسمع بلسان عشاقه ثناه وشكره

حتى لوّ اللي حصل له كله من أسبابك
والله إن تبقى نظر عينه.. وشاغل فكره

قالوا إن الوقت نوب يحول دون أحبابك
وإن حصل قرّب لك أحبابك ..لاتامن مكره

قلت لابالله حرمني شهدك وعنّابك
ساق دمعي ..واحتدى قلبي على مايكره

والدليل..إنه قفل من دون وجهي بابك
دار حول..ولاأعرف (ا)من وصالك ألا ذكره