الصحة اكبر تاج عالراس

ابو سالم يقول ان المرض خلا العظوم الجاج
اشوف جبال قدامي من اول كنت طايلها

وذلحينه عسى ربي يسهلها علي بافراج
اماني دونها ركت عظومي كيف احايلها

صدق من قال صحة لادمي عالراس اكبر تاج
حقيقة شفتها واقع وصح لسان قايلها

انا ليه قريب اسبوع كأني اكتوي بالصاج
طريح الفرش والدنيا علي تفتل حبايلها

ولا صاحب سأل عني ولا دخله ولا مخراج
حبيس البيت في غرفة على لمتان شايلها

وانا شاعر ولي هاجس وعطره عالخليقة ناج
هجوسي نار وقادة وكم تقدح فتايلها

نعم شاعر ولايطفى سراجي دائماً وهاج
معي جنية في راسي وهي شيخة قبايلها

ولي موقف رجولي صدق مانا ادمي هراج
فهمت ان الهدف غاية ولا برر وسايلها

خسارة لو يضيع الحلم والاوراق فالادراج
خسارة في صداقة ناس تبخل في رسايلها

يمر الليل من طوله كما فلمن بلا انتاج
هواجيس وشجن وهموم معي تفعل فعايلها

واحلامن كثيرة مرهقة لي جابت الازعاج
تطير نوم بو سالم اذا فكره تخايلها

ليالي سود والتغطية فيها مابها ابراج
ليالي من اواخرها توديني اوايلها

وجر الصوت من قلباً ولع لانسنست افواج
تهز القلب هز اشجار يعجبني تمايلها

الا ياللي قطعت الوصل وصلك للمحب اعلاج
ترى من حب ناس بصدق ماينسى فضايلها

كذا باخاطبك حتى ولو سببت لك احراج
لان اهل المحبة واجب اتبين دلايلها

اذا حبوا بصدق اقلوب وتمشوا على منهاج
تحقق حلمهم كله وباتوا في شمايلها