تعبير عن الماضي وزمن البداوة - خلف عبدالهادي الجذع

يازين الزمان اللي مضى وانقضى زيناه
زمان البداوة والضعن والمظاهيري

يوم كل يشد مع البراري على هواه
ياما احلى بوقت الوسم طرد ا لمخاضيري

وياما احلى الربيع ليا فخر عشبه بمرعاه
ثم قام يتغريف واشتبك بالنواويري

ليامن الحوّير وسط نبته برك غطّاه
وبالوبل تساقيه المزون المزابيري

ريحة قحويانه مع شقاراه وخزاماه
انوج من جميع اطياب شيخ العطاطيري

وان ذعذع هواءه بلطف ينعشك من شذاه
كنه يقول الله يمسيك بالخيري

له قيمه وله متعه وله لذه وطراه
تعرفها الوجيه الفالحه والمسافيري

نقيّا هواءه وماءه زودا على عذاه
علاجا للنفوس الموبيات المداهيري

وخباريه تشبه للبحيرات في بهاه
ربيعا بمعنى الكلمه وكل تعبيري

تسمن به سهاف النوق يازينها ترعاه
قطعانا مجاهيم وكذلك مغاتيري

شول كن حرة كشب في وصفها ملحاه
تسكّر بالجسامه مطلع الشمس تسكيري

منظرها جميل وبالحليب القدر تملاه
تروي كل اهلها والفرس والخطاطيري

ويحتار الموصّف بالتواصيف في وضحاه
مابين الجسم ومن اللون يحتار تحييري

الا ان قلت فيها من جبل قطن بعض حلاه
كبر الجسم ومن اللون حليا وتنويري

وهي ابيض منه تفوق باللون مستواه
كما لمبة من ساطعات الفنانيري

واليا عطّفوها كانها الغيث من سماه
ليا خيّل وسيّل ماقفته الاعاصيري

وفي حليبها ميزه لذيذة مع الحلاه
من طعم الشقارا والعشوب المزاهيري

ما تأكل نخال ولاتعرفه ولا تبغاه
ولاعمرها حطوا لها تبن وشعيري

ولا شالها العامل بونشه على دنّاه
ولاسجنت بشبك ولا ولوها البقاقيري

ترى نبت عشبا بالمكان الذي تشهاه
قفرا مابه الا بيوت اهلها دواويري

ياما احلى عطاياالله عقب شبعت مضوّاه
ويسلّيك تدريج النياق المصاغيري

ويسلّيك مبدأ الرجم فالصبح ومعداه
وتشرح بالك عساسة دياراً مقافيري

وتشاهد ويشرح بالك الصيد بالفلاه
تذيّره الرعايا من معالية تذييري

في قفرا فياح ضبية يزاحم حباراه
وتشوف الارانب في فياضة مخاميري

ولاتغيب عن عينك كراوينه وقطاه
وبطاط الخباري وسط ماءها متابيري

وياكثر الزبيدي في عذا ديرته كثراه
يكثر منه من عاش ببراريه تكثيري

رجل الباديه يحصل على الزاد في صحراءه
ماهو بحاجة يسعّر من المده تسعيري

عند ادباشه ويضمن عشاء جاره وعشاءه
من صيد الخلا تيسير ماهو بتعسيري

وان سيّر عليه احد الربوع وذبح له شاه
يحط الحباري فوقها زود تقديري

ويحط الطوس من حول مائدته مملأه
تزاهر ملايا من حليب الاباكيري

حليب اباكير شقح يالذه وما احلاه
كأن سكر نبات مكسّرً فيه تكسيري

في دار مراتعها هوى خاطري ومناه
جنوب او شمال او شرقي او غربي النيري

مراتع قرارة نجد ياطيبها طيباه
من عقب التجارب ماني بناشدً غيري

دار الحمض بأنواعه تميّز به وتزهاه
ودار العشب بانواعه بساتينه تصيري

في غربيها حبر المسمى وما حاذاه
وجنوبيها الصاقب وسقمان والضيري

وفي شرقيها العارض الى المستوي واقصاه
وشماليها البهرة ومنها الى كيري

هذا موجزا من شف بالي ومن هواه
وانا فيه مااسمع قول عذّال ومشيري

© 2022 - موقع الشعر