سبحان من يعلم الاسرار سبحانه - نايف العبيد

ماني مصدّق يجافيني وينساني
عقب الغلا والهوى والشوق واشجانه

أول من الشوق والأشواق ينصاني
سبحان من بدّل الأحوال سبحانه

بالصد والهجر والحرمان يجزاني
مايرحم اللي عليه الروح ولهانه

كنت اتمناه يوم انّه تمناني
يوم اني اغلا على قلبه من أخوانه

يوم انه لشوفتي شفق(ن) وطرباني
ينسى ليا شافني حيّه وحيانه

إن غبت ساعة يدورّني ويلقاني
وافين يوم الزمن داين وديّانه

اتعب على شانهم ماهو على شاني
أرخصت روحي وذقت المر بلوانه

خلّيت كل العرب طامح وطنياني
لوصار ماصار فدوة داعج اعيانه

ياما تمثلّته ابشعري وقيفاني
وعسفت له مهرة الأشعار وحصانه

قطفت له من فياض الحب ريحاني
وظللّته ابدوحة الأشواق واغصانه

وخلّيت له خافقي روض(ن) وبستاني
يقطف على مايبي توته ورمانه

والحين مايلتفت لامن تعداني
وامن أول(ن) ينتشي لاجيت بوزانه

يرضى علي الضحى والعصر زعلاني
مشكلته إنّه يطاوع هرج شيطانه

مشكلته إنّه يطاوع هرج عدواني
ناس(ن) على شبّة النيران طربانه

خلصت من جملة الأحباب ياخواني
الحب كم كم وكم قاسيت نيرانه

والحمد والشكر لله بوّل وثاني
وسبحان من يعلم الأسرار سبحانه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر