ياللي مع غيري وأنا لك لحالك
 في ذمّتك ذاللي تسوي بي إنصآف ؟
 قلت آتصبّر يمكن أن ذا دلالك
 ما مرّ في بالي خفوقك لنا عاف
 كنت آتمنّى ترجع تضم هالك
 وتروي خفوقٍ من قسى هجركم جاف
 كان يتطلّب في صلاته وصالك
 ومن طول هجرك شانت أحواله ولاف
 وكانت هواجيسه فيك وحوالك
 والناس من حوله ملايين والآف
 وأكبر طموحه جمع فاله وفالك
 بدروب حبٍّ صافيٍ كلها نظاف
 وجفنٍ حفظ صورتك يا ما سرى لك
 رغم السهر كابد لجور التعساف
 ضمك من هروج العواذل وشالك
 والدمع منّه أغرق الجيب هكاف
 واليوم ضاقت في عيوني المسالك
 وبدّلت موقع شوفتك راس مشراف
 وأصبح نهاري مظلمٍ بي وحالك
 ما دام زولك راح ما عاد ينشاف
 أكبر خطأ لعبك على من صفا لك
 وأكبر مصيبه تنطح المال بإسراف
 قصر النظر والكبر سبب هبآلك
 وساقك وصرت لجرّة الغير طواف
 تبي الحقيقه وحطّها وسط بالك
 ولا عاد تطري لي عقبها تحساف
 أصبحت بصمة عار شعرٍ سما لك
 من عقب ما أنت تنوّر الشعر والقاف

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر