اخوان جوزا

لـ معيض احمد الزهراني، ، في غير مُحدد، آخر تحديث

اخوان جوزا - معيض احمد الزهراني

ياربّ ياللي عليك الرزق والاتكال
يامن خلقت الزمان وجيل من بعد جيل

اكتب لنا رحْمَتُك في حلّ والا ارتحال
ولا تكلْنا إلى انْفُسْنا بمقدار ميل

واْحقن دم المسلمين وفك قيد الجدال
لاصارت الفتنةْ العظمى تحطّ وْتشيل

أمة محمد تحاول تكسب المونديال
ولازالت الكوره ابملعب بني صامويل

الوضع مزري ولكني على كل حال
ماجيت لجل اشكي الظيم المتين الطويل

جينا لشان الرجال اللي تهز الجبال
قومٍ لهم في سما العليا مبات وْمقيل

اخوان جوزا ليا جات العلوم الثقال
مثل الجبال الرواسي والبحر والنخيل

ان ثارت الهيّةْ ودارت رحاة القتال
في ذمتي: حرب مافيهم ضعيف وحليل

يابدر يابن سعود انتم رماح السجال
يامشهرين القنا ومزبنين الدخيل

حروبكم ف الحجاز وْ وسمكم لايزال
تاريخ ماتاسع امجاده بحور الخليل

فيكم طناخةْ لو توزّع لروس الرجال
ماظن في سوريا يبقى جريح وقتيل

يفداكم اللي ليا طارت سهوم النبال
قهقر و ولّى الدبُر وادبر بليّا حصيل

جينا لميقافكم ننظم حروفٍ جزال
في مدح من قدّره ربي لفعل الجميل

محفل ذوي صالح/الكامل فريد الجمال
حيث انه لكل من راد المكارم دليل

والصالحي بدر واخوانه كرام السبال
محمد وثامر ونعْم الخوي والزميل

والطيب في راس ابومنصور طول الليال
لو مالت جبال...راسه راسي ولايميل

الله يبارك لكم يانادرين الخصال
لو قلت بحصي شمايلكم ف ذا مستحيل

يسترسل القول لكنْ مابقى لي مجال
المدح فيكم شرف والشعر فيكم جزيل

© 2024 - موقع الشعر