كرسيٍ بروضة مسجد الربع يا سعيد
بيّح بسدّي لين هاضت شجوني
بيّحت ما كنّيت ضاقت بي البيد
وأزريت في دمعة محاجر عيوني
كرسي الكريم اللي يعزّ الصناديد
ويكرم ضيوفه لو عشاهم ديوني
ذبّاح حيلٍ عند أهلها ملاهيد
وصبّاب غالي السمن فوق الصحوني
شوفه لهشال الخلا كنه العيد
لا من لفوا له فزّ فزّة فتوني
وقف لهم يثني التراحيب ويعيد
وفي ظفّ ريفة فاختوا كل هوني
وجدد لهم من كيفة البنّ تجديد
وتخالف صحونٍ بها كل لوني
أبو محمد لا فتل وقتنا القيد
طوّل خطاوينا حريب العفوني
في حبّ ربعه ما سمع للمقاريد
يحبّ ربعه للقرابه يصوني
ولو قصّروا ما هو براعي مناقيد
يدمح خطاهم ويتكلا الغبوني
مرحوم يا عودٍ وفا طيبه يزيد
عيني عقب فقده تساقي جفوني
ومرحوم ياللي مان قل بالصدر كيد
ومرحوم يالمنعور ريف الظعوني
عساه في الفردوس ينعم بها سيد
وتسقي ثراه مروحات المزوني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.