انا مثل النهر يشرق

جلست افكر بحظي ولا ادري عن مواجيبه
اقلب كفي بكفي واقول اليوم ينساني

حكاوي شوق في قلبي تصليني مشاهيبة
ذبحني الشوق يا خلي وسهرني وبكاني

انا مثل النهر يشرق وهو يسقي مشاريبه
تعبت اوصف الحالة واقول اليوم وحداني

تعبت اقول مشتاقه وهو سبة تصاويبه
تعبت ولا لقيت اللي يسايرني على الحاني

غيابه جز لي روحي غرس فيني مخاليبه
بكيت البعد يا عمري وضعت فباقي احزاني

يلف الكون في لحظه وتدوربها دواليبه
واشوفه بين احلامي حقيقة حلم سلاني

اهو ضايعبي من مده وانا من مده غاديبه
انا كفيته بحبي وهو في حبه كفاني

هوانا صادق ونادر ولا حب(ن) يساويبه
حقيقة حبنا طهره .. يعلي شانك وشاني

انا ما همني ناس(ن) تكثر في عذاريبه
اشوفه كامل بعيني ولا حد(ن) يشبهه ثاني

خذيت اشواقك الحرقا تدفيني لواهيبه
وعطيتك شوقي لك كنزه تدفي قلب ولهاني

تعال اسكن وسط قلبي وصير اغلى معازيبه
تقهوى من دلال الشوق وبهرها على شاني

تعال اسمع وش احكيلك سوالف ما بها ريبه
سوالف حب عشقانه لها الخفاق طرباني

تعال اقرب وحط اذنك على قلبي ومساريبه
تسمّع همس دقاته احبك حيل يا فلاني

ابحكيلك عن اشواقي وحب(ن) لك اماريبه
تعال اسمع حديث القلب عن اللي حبه اظناني

عشقتك والعشق بلوى اخذني في عراقيبه
هويتك من صميم القلب ولاحد(ن)غيرك اشقاني

تعال وطل في جوفي تشوف احلى تراحيبه
عروق القلب طربانه تهلي بأغلى خلاني

تعلى بجيتك فرحي على قلبي سواحيبه
وتمطر حب في جوفي ويزهر وردك الحاني

واعلق لك على ضلعي عقود(ن) في غياهيبه
عقود(ن) من كرياتي تنور حيل وجداني

تعال وشوف ديواني تشوف اصدق مكاتيبه
كتبت الشعر بحضورك .. غيابك هد قيفاني