واحد فقير

حلمت وآنا صغير اصير "واحد كبير"
عندي ملايين واعطي ذا وعيني بذا

ويصير حولي من الاقوام جمعٍ غفير
عادي لو اقول: كونوا لي دروب وحذا.!

يتسابقون وعشان المال يكرم ضمير
ماهمّهم لو لحقهم لجل "بشتي" أذى

أهينهم مثل ماهان الطريق / الحمير
واصبّ ف عيونهم كحل ....وشويّة قذى

عشان يمشون مثل: التايه المستجير
ان قال ليه؟. اشّر لراسي واقلّه: كذا.!!

والاّ مثل كلب يلهث من ظماه ويسير
اجوّعه لجل : يتبعني يدوّر غذا ...!!

اضحك بوجه الغني لو كان ملعون صير
واعبس بوجه الفقير اللي انحرم ماخذا

اسرق ومن ماسرقت اعطي. وخيري كثير
ويمدٓحني الشاعر المستكذب الجهبذا

ومتّ.. واقتادني مالك لنار السعير
حولي سرادق تلقّيني شديد الأذى

"وقمت مفزوع من حلمي" واتالي الزفير
وارتحت يوم ان هذا حلم عابر.. لذا:

الحمدلله.. انا لازلت " واحد فقير "
مظلوم ماني بظالم ، حبّذا حبّذا ..!!