بعد غيبة طويلة

لـ عبدالرحمن ناهي، ، في غير مُحدد، 1،068، آخر تحديث

بعد غيبة طويلة - عبدالرحمن ناهي

يعد غيبه طويلة عقد والّا يزيد
جمّعَتْني معاه اقدار بامّ القرى
لي صداقة معاه امْن الزمان البعيد
من زمان الطفولة يوم كنا اقْصَرى
ابتداني ملامه ليه قلبك حديد
لا ذكرت الطفوله ولا خيالك سرى
قلت وقتٍ تعد ا لاتظنّه يعيد
لوحةٍ هدّها التاريخ ما تنقرى
اتعبتنا الليالي والزمن له جديد
بين شين الظروف وبين وقت افترى
شتّت القلب همّه كل يوم بريد
من سبايب بريده شوف جسمي برى
كل جرحٍ من الأحزان ينشد نشيد
لا تدوّر ورى صلف الهبايب ذرى
نطرد الوقت وطيور الرجا ما تصيد
مثل كف البخيل اللي تنكّس ورى
المشاعر تخاوت شمسها والجليد
سالت ابوادي النسيان تحت الثرى
اشهد انك يا بن جدلان قولك سديد
يوم قلت الزمن جحّاد ما هو افترى
يجحد الناس طيب اهل الصخا والحميد
لو لحقهم من اصدوف الليالي عرى
يجحد العاق فضل الوالدين ويحيد
عن حقوقٍ فرضها الله بين الورى
ويجحد العاق مدّات الوطن والشهيد
لو نبت ريشه العاري ونابه ضرى
كل وقتٍ مع ناسه احسابه شدي
وكلّ فعلٍ مع واديه سيله جرى
وان ذكرت الطفوله والزمان السعيد
قلت حياك وقت في خيالي طرى
كنّي اللي نساه الهم قلبه بليد
ما يهمه من الاحداث مهما جرى
مكتفي من حياته بالمزاح الزهيد
داله القلب سالي ما عليه ابصرى
عاد يا خوي لا تشره ومثلك رصيد
شوفتك يا صديقي بالذهب تنشرى
عبدالرحمن الناهي
© 2024 - موقع الشعر