قالوا الشعار الشيب الوقار

قالوا الشعّار " الشيب الوقار "
قلت مدري لا أقرّ ولا أنكره

كنت طالب وقتها مالي قرار
كل همي كيف أعبّي المحبره

وكنت أظن الشيب يظهر بالغرار
يروح لا حطّوا صباغٍ يستره

وبعد شبت وشفت كيف الجسم صار
عرفت اش معنى وقار و محقره

يحقرك شبّان اكبار وصغار
والمصيبة تحقرك حتى المره

نظرْت وإنه صدق إني من الكبار
شايب بعكّاز محنيّ ظهَرَه

إن بغيت أقوم ايبان العوار
أمشي فوق أربع وراسي أحدره

أشبه الضب إن تلفّت ثم سار
منزّل ايديني عشان أرفع وره

وإن بغيت يمين أعطيها يسار
اتجه مع اتجاه الدحدره

الخوي عكّاز مشري من المطار
من بلاد الترك من شغل أنقره

معلقٍ بأطرافه أكياسٍ كثار
أدوية مع كيس بيت المنظره

وإن بغيت أخرج أروّح بالنهار
وأرجع بوقتي وليلي أحذره

أشتهي نظرة لناقة مع حوار
وأشتهي لحليب خلفة وعْشَرَه

وإن قلت ودوني ولا أقبل عذار
يقولون ابشر لو تبي للمقبره

هذا هو اللي يسمونه وقار
قد قهرني يا عسى الله يقهره